Local News India : వైశాఖ శుద్ధ తదియనే అక్షయ తృతీయగా జరుపుకుంటాం. అక్షయం అంటే క్షయం లేనిది.. తరగనిది అని అర్థం. ఈ రోజును చేసే దానాలకు విశేష ప్రాధాన్యత ఉంది. సూర్య చంద్రులు శక్తివంతంగా ఉండే ఈ రోజు దాన ధర్మాలకు, పుణ్య కార్యాలకు చాలా ముఖ్యమైంది. వేదాల్లో మాత్రం బంగారం, నగలు కొనుగోలు చేయాలని చెప్పలేదట.
ఇక, శివుడి అనుగ్రహంతో సంపదలకు రక్షకుడిగా కుబేరుడు నియమితుడైన రోజు, మహాలక్ష్మిని శ్రీహారి వివాహం చేసుకున్న శుభదినం కూడా ఇదే. ఈ రోజు బంగారం కొని లక్ష్మీదేవికి అలంకరించి పూజ చేస్తారు. ఇలా చేస్తే ఇల్లు సిరిసంపదలతో తులతూగుతుందని భక్తుల నమ్మకం. ఇక, కుబేరుడి కరుణ ఉంటే సంపదలకు లోటే ఉందంటారు. ఐశ్వర్య ప్రదాత లక్ష్మీ దేవి అయితే దానిని అందించేది కుబేరుడు. కుబేరుని అనుగ్రహంతో సిరులు కలుగుతాయి. మరి ఆ కుబేరుని లక్ష్మీదేవితో కలిసి పూజిస్తే, మరింత అనుకూలంగా ఉంటుందని పండితులు వివరిస్తున్నారు.
అక్షయ తృతీయ రోజు లక్ష్మీదేవి అనుగ్రహం కోసం కుబేర లక్ష్మీ పూజ చేస్తే ఫలితం దక్కుతుందట. ఈ రోజున సూర్యోదయానికి ముందే లేచి స్నానమాచరించి పూజా మందిరం శుభ్రం చేసి, అలంకరించాలి. ఓ పీటకు పసుపు రాసి బొట్టుపెట్టి దాని కింద పసుపు, బియ్యం, నాణేలు ఉంచి కలశం ఏర్పాటు చేయాలిలి. అరటి ఆకులో బియ్యం వేసి దానిపై ప్రమిద ఉంచి దీపాన్ని వెలిగించాలి. పసుపుతో వినాయకుడిని తయారుచేసి, కొత్త వస్త్రాలు, బంగారం ఆభరణాలు ఉంటే కలశంపై ఉంచాలి. చక్కెర పొంగలి, పాలతో పాయసం తయారుచేసి నైవేద్యంగా ఉంచాలి. కుబేర లక్ష్మీ మంత్రాన్ని ఉచ్చరించాలి. ‘ఓం శ్రీం హ్రీం ఐం కుబేర లక్ష్మీ కమలధారిణ్యై, ధనాకర్షిణ్యై స్వాహ’ మంత్రాన్ని 108 సార్లు ఉచ్చరించడం వల్ల అమ్మవారి అనుగ్రహం లభిస్తుందట. దీనితోపాటు ‘ఓం హ్రీం శ్రీం క్రీం కుబేరాయ అష్టలక్ష్మీ మమ గ్రిహి ధనం పూరయ పూరయ నమః’ మంత్రం కూడా జపించాలి.
