హైద్రాబాద్, ఏప్రిల్ 5, (Local News India)
మజిలీ ఈ పేరు వింటేనే అందులో ఏదో తెలియని మత్తు ఉంటుంది. అందుకే వివిధ జానర్స్‌లో ఎన్ని సినిమాలు వచ్చినా ప్రేమకథలదే అగ్రతాంబూలం. సినిమాలకు మూల ధనమైన ప్రేమకథల్ని ఎన్నిసార్లు చూపించినా ఏదో పాయింట్ కనెక్ట్ చేసుకొని ప్రేక్షకులు ఆదరిస్తారనే నమ్మకంతో వందలాది ప్రేమకథలు పుట్టుకొస్తూనే ఉంటాయి. అలా ప్రేమ, పెళ్లి మధ్య సంఘర్షణలతో వచ్చిన ప్రేమకథా చిత్రమే ‘మజిలీ’. విశాఖతీరంలో క్రికెటర్ కావాలని కలలు కనే పూర్ణ (నాగ చైతన్య) తండ్రి సంపాదనతోనే జల్సాలు చేస్తుంటాడు. తల్లి లేని బిడ్డ కావడంతో పూర్ణను చాలా గారాబంగా పెంచుతాడు పూర్ణ తండ్రి రావు రమేష్. సముద్రంలో బోటులాంటి పూర్ణ.. షిప్ లాంటి అన్షు (దివ్యాంశ కౌశిక్)ని ప్రేమిస్తాడు. సాఫీగా సాగిపోతున్న వీరి ప్రేమ ప్రయాణంలో సముద్రపు అలలుగా విలన్ భూషన్ (సుబ్బరాజు), అన్షు పేరెంట్స్ అడ్డుగా తగులుతారు. అన్షుని పూర్ణకి దూరం చేసి వేరే పెళ్లి చేస్తారు. పూర్ణ దేవదాసుగా మారి.. తండ్రి కోరికను కాదనలేక అయిష్టంగా తనను చిన్నప్పటి నుండి ప్రేమిస్తున్న ఎదురింటి అమ్మాయి శ్రావణి మెడలో తాళి కడతాడు. ప్రేమించిన అమ్మాయిని మరిచిపోలేక.. ఇష్టం లేని కాపురం చేయలేక మదనపడే భర్త.. పెళ్లైతే కొడుకు మారతాడని ఆశ పడే తండ్రి.. భర్త మనసుకు తగిలిన ప్రేమ గాయం మాని ఏనాటికైనా తనపై ప్రేమ కురిపిస్తాడని భార్య.. కూతురు కాపురం నిలబడాలని కోరుకునే తండ్రి (పోసాని).. వీరి మధ్య సంఘర్షణ ఏ తీరానికి చేరిందన్నదే ‘మజిలీ’ చిత్రం. మూగ మనసులు.. ప్రేమాభిషేకం.. ప్రేమ్‌నగర్.. మజ్ను.. అభినందన.. ఇలా వందలాది ప్రేమకథలు చూసిన కళ్లకి మరో ప్రేమకథని చెప్పి మెప్పించడం అనేది చిన్న విషయం కాదు . అయితే శివ నిర్వాణ లాంటి దర్శకుడు ఎన్నిసార్లు చూసిన కథలనైనా హృదయానికి హత్తుకునేలా చెప్పగలనని తొలి చిత్రం ‘నిన్నుకోరి’తోనే నిరూపించుకున్నారు. ప్రేమించడం.. తరువాత విడిపోవడం.. విడిపోయిన తరువాత ప్రేమను పొందుకోవడం ఎలా? అన్న ప్రశ్నకు ఆయన తొలి చిత్రంతో సమాధానం ఇచ్చారు. ఏ ప్రేమ కథకైనా లవ్ అండ్ బ్రేకప్ వరకూ కథను నడిపించడం ఈజీనే.. కాని బ్రేకప్ తరువాత కథలో చాలా స్ట్రగుల్స్ ఉంటాయి. ఆ స్ట్రగుల్‌ని బ్యాలెన్స్ చేయండంలో దర్శకుడు శివ నిర్వాణ దిట్ట అనే చెప్పాలి.
ఈ కథలో రొటీన్ సంఘర్షణ తాలూకు ఇంపాక్ట్‌ని తగ్గించడానికి దర్శకుడు శివ నిర్వాణ సమంత, నాగ చైతన్య, రావు రమేష్, పోసాని లాంటి పవర్ క్యాస్టింగ్‌తో పాటు.. ఫ్రెష్ అప్పీల్, మ్యూజిక్ లాంటి వనరులన్నింటినీ పర్ఫెక్ట్‌గా ఉపయోగించుకున్నారు. వాస్తవానికి మంచి ప్రేమకథకి కావాల్సింది చక్కని పెయిర్‌.. సమంత- నాగ చైతన్యలను పెయిర్‌గా ఎంచుకుని సేఫ్ జోన్ చూసుకున్నారు దర్శకుడు. సింగిల్ పాయింట్ కథకు తనదైన శైలిలో దర్శకుడు శివ నిర్వాణ సీన్లను అల్లుకొన్నాడు. కానీ రొటీన్ పాయింట్‌ను కొత్తగా చూపించడంలో కాస్త తడబడ్డాడు. ఫస్టాఫ్ మొత్తం పూర్ణ- అన్షుల మధ్య ప్రేమను సాఫీగా నడిపించి.. సెకండాఫ్‌లో సమంత ఎంట్రీతో పెయిన్‌ని మొదలుపెట్టించారు. భావోద్వేగ సన్నివేశాలు.. బలమైన డైలాగ్స్‌తో మంచి ఫీల్‌ను కలిగించారు. రావు రమేష్, పోసాని లాంటి నటులను పూర్తి స్థాయిలో ఉపయోగించుకుని కథలోని లోపాలను కప్పిపుచ్చుకున్నాడు దర్శకుడు. ‘మజిలీ’ అసలు కథలోని వెళ్లడానికి చాలా టైం తీసుకున్న దర్శకుడు స్మూత్‌ టేకాఫ్‌ లేకుండా సెకండాఫ్‌లో నాటకీయత చొప్పించారు. కథలోకి సమంత ఎంట్రీ ఇచ్చిన తరువాత ఊపందుకుంది. ఎమోషన్స్ సీన్స్‌లో సమంత పెర్ఫామెన్స్ చైతూని డామినేట్ చేసింది. సినిమాలో ఆమెను చూస్తే.. ఇలాంటి పెళ్లం మనకు ఉంటే బావుండు అని అసూయ రాకమానదు. ముఖ్యంగా క్లైమాక్స్ సీన్ సినిమాటిక్‌గా అనిపించినప్పటికీ ఎక్స్‌ప్రెషన్స్‌తో కట్టిపడేసింది. ఈ చిత్రంలో సెకండ్ హీరోయిన్‌గా నటించి దివ్యాన్ష కౌశిక్. ఎంట్రీలోనే మంచి పెర్ఫామెన్స్ ఇచ్చింది. నార్త్ అమ్మాయి అన్షు పాత్రలో న్యాయం చేసింది. నాగ చైతన్య రెండు డిఫరెంట్ షేడ్స్ ఉన్న పాత్రలో కెరియర్ బెస్ట్ పెర్ఫామెన్స్ ఇచ్చాడు. అయితే ఈ సినిమాలో నాగ చైతన్య పాత్ర ద్వారా హీరోయిజాన్ని ఊహించలేం. కొడుకుగా.. క్రీడాకారుడిగా.. ప్రేమికుడిగా.. భర్తగా.. అల్లుడిగా ఇలా ప్రతి విషయంలోనూ హీరోలో ఫెయిల్యూర్స్ కనిపిస్తాయి. భార్య సంపాదన కావాలనుకునే పూర్ణ.. ఆమె కొనిచ్చిన బైక్‌ని తీసుకోవడంలో ఉండే ఇబ్బంది ఏంటో సరైన కారణాన్ని చూపించలేదు. గోపీ సుందర్ సాంగ్స్‌తో పాటు.. తమన్ బ్యాగ్రౌండ్ మ్యూజిక్ సినిమా స్థాయిని పెంచింది.ఓవరాల్‌గా.. ‘మజిలీ’ ఇదో భావోద్వేగ ప్రేమకథ. ఇలాంటి మంచి పెళ్లం దొరకడం అరుదే కాని చైతూ అదృష్టవంతుడు కదా. అందుకే ఈ ‘మజిలీ’ ఇలా కలిసి వచ్చింది
